अष्ट्रेलियन क्रिकेटर ग्लेन म्याक्सवेलले १३ वर्ष लामो एकदिवसीय अन्तर्राष्ट्रिय (ओडिआई) करियरलाई अन्त्य गर्दै ओडिआई क्रिकेटबाट सन्यासको घोषणा गरेका छन्। ३६ वर्षीय म्याक्सवेलले १४९ ओडिआई खेलमा ३,९९० रन बनाएका छन्, जसमा चार शतक र २३ अर्धशतक समावेश छन्। उनको स्ट्राइक रेट १२६.७ रहेको छ, जुन ओडिआई इतिहासमा २,००० रनभन्दा बढी बनाउने खेलाडीहरूमा दोस्रो उच्चतम हो ।
म्याक्सवेल अष्ट्रेलियाको दुईवटा ओडिआई विश्वकप जित्ने टोलीका सदस्य थिए। २०२३ विश्वकपमा अफगानिस्तानविरुद्ध २०१ रनको अविजित पारी खेलेका थिए, जुन ओडिआई इतिहासको एक उत्कृष्ट इनिङ मानिन्छ । उनले ७७ विकेट लिँदै बलिङमा समेत महत्त्वपूर्ण भूमिका खेलेका छन्।
म्याक्सवेलले ओडिआई क्रिकेटबाट सन्यास लिने निर्णयको मुख्य कारण शारीरिक थकान र चोटपटकबाट आएको प्रभाव रहेको बताएका छन्।
२०२२ मा खुट्टामा गम्भीर चोट लागेपछि उनको फिल्डिङ प्रदर्शनमा गिरावट आएको थियो, जसले उनलाई ओडिआई फर्म्याटमा प्रभाव पार्न कठिन बनाएको थियो ।
ओडिआई क्रिकेटबाट सन्यास लिए पनि म्याक्सवेलले टी२० अन्तर्राष्ट्रिय क्रिकेटमा आफ्नो करियर जारी राख्ने घोषणा गरेका छन्।
उनले २०२६ मा भारत र श्रीलंकामा आयोजना हुने टी२० विश्वकपमा अष्ट्रेलियालाई जित दिलाउने लक्ष्य राखेका छन् ।
म्याक्सवेलको ओडिआई क्रिकेटबाट सन्यास अष्ट्रेलियाली क्रिकेटका लागि एक युगको अन्त्य हो।
उनको विस्फोटक ब्याटिङ, कुशल बलिङ र उत्कृष्ट फिल्डिङले उनलाई ओडिआई क्रिकेटको एक अद्वितीय खेलाडी बनाएको थियो।
ग्लेन म्याक्सवेल र सन्दीप लामिछानेले अष्ट्रेलियाको बिग ब्यास लिग (BBL) मा मेलबर्न स्टार्स टोलीमा सँगै खेलेका थिए। सन्दीपले २०१८-१९ सिजनमा मेलबर्न स्टार्समा डेब्यू गरेका थिए, जुन बेला म्याक्सवेल टोलीका कप्तान थिए।
