काठमाडौँ : वैदिक ज्योतिष शास्त्रमा ग्रहहरुका चालको विशेष महत्व छ। ग्रह-नक्षत्रको चालको प्रभाव सबै १२ वटै राशिहरुमा पर्छ। ग्रहहरुका चालबाट केही राशिहरुले शुभ फल प्राप्त गर्दछन् भने केही राशिलाई अशुभ फल प्राप्ति हुन्छ।
ग्रहहरुका चालबाट नै साप्ताहिक राशिफलको आँकलन गरिन्छ। वि.सं. २०८२ सालको दोश्रो महिना जेठको अन्तिम साता(जेठ २४ गतेदेखि जेठ ३० गतेसम्म) ग्रहहरुका चालले गर्दा केही राशिका लागि अत्यन्तै शुभ हुनेछ भने केही राशि सावधान रहनुपर्नेछ।
मेष (चु, चे, चो, ला, लि, लु, ले, लो, अ):
साताको शुरुवातमै प्रतिष्ठित र प्रभावशाली व्यक्तिसँगको भेटघाटले नयाँ अवसरहरू निम्त्याउनेछ। उच्च पदस्थ व्यक्तिहरूसँग सम्बन्ध प्रगाढ बनेर लाभदायक योजना हात लाग्नेछन्। पदोन्नतिको योग बलियो देखिन्छ भने पुरानो मेहनतको प्रतिफल समेत यसै साता प्राप्त हुनेछ। घरजग्गा सम्बन्धी कामबाट राम्रो आम्दानी हुनेछ र अदालतसम्बन्धी विवादबाट छुटकारा मिल्ने सम्भावना प्रबल छ। यात्राको योग छ, जुन सफल र लाभदायक हुनेछ। प्रियजनबाट उपहार पाउने सम्भावना रहेको छ, जसले मन रमाउनेछ। धार्मिक कार्यक्रम वा सामाजिक समारोहमा सहभागी हुने अवसरले आत्मसन्तोष प्रदान गर्नेछ। पारिवारिक सद्भावमा वृद्धि हुनेछ र मनमा नयाँ प्रेरणा पलाउनेछ।
वृष (इ, उ, ए, ओ, बा, बि, बु, बे, बो):
यो हप्ता वृष राशि भएकाहरूका लागि उतार-चढावयुक्त देखिन्छ। व्यवसायमा सानदार प्रगति भए तापनि खर्चमा नियन्त्रण गर्न नसक्दा आर्थिक तनाव आउन सक्नेछ। रोजगारी परिवर्तन वा पदोन्नतिको संभावना प्रबल छ, जुन भविष्य निर्माणमा सहयोगी हुनेछ। साताको मध्यतिर स्वास्थ्यसम्बन्धी समस्या देखिन सक्छ, जसले आकस्मिक खर्च निम्त्याउन सक्छ। आत्मसन्तुलन गुमाउँदा आफ्नै कारणले असन्तुष्टि बढ्न सक्छ, त्यसैले व्यवहारमा धैर्य आवश्यक छ। परिवारको सहयोग पाइनेछ, तर निर्णय गर्दा सजग रहनुपर्छ। आत्ममूल्याङ्कनको समय हो, गहिरो सोचले मार्गदर्शन गर्नेछ।
मिथुन (का, कि, कु, घ, ङ, छ, के, को, ह):
साताको शुरुवातमा उच्च अधिकारीहरूसँग मतभेद हुन सक्ने सम्भावना छ, त्यसैले बोली र व्यवहारमा संयमता अपनाउनु उचित हुनेछ। सानातिना कुराले पनि झगडा निम्त्याउन सक्छ, जसले काममा असर पार्नेछ। स्वास्थ्य कमजोर हुन सक्छ, जसले कार्यक्षमता घटाउनेछ। आर्थिक अभावको स्थिति देखिए तापनि साताको मध्यबाट अवस्था सुधार हुने संकेत छ। महत्वपूर्ण काममा सफलता मिल्नेछ र आफन्तहरूको सहयोगले समस्याहरू हट्न सक्छन्। विगतका गल्तीबाट पाठ सिकेर अघि बढ्दा शत्रुपक्ष कमजोर बन्नेछ। सन्तुलन कायम राख्न सकियो भने स्थिति पूर्णतः अनुकूल बन्नेछ। सामाजिक सम्बन्धमा सुधार ल्याउने समय हो।
कर्कट (हि, हु, हे, हो, डा, डि, डु, डे, डो):
सप्ताहको प्रारम्भमै स्वास्थ्य कमजोर हुन सक्नेछ, विशेष गरी पाचन र स्नायु सम्बन्धी समस्याले सताउन सक्छ। घरपरिवारमा मनमुटाव हुनसक्ने देखिन्छ, विशेष गरी दाजु-भाइ वा दिदी-बहिनीसँग असमझदारी बढ्न सक्छ। अवसर आए पनि त्यसको फाइदा लिन चुनौतीपूर्ण हुनेछ। आर्थिक लेनदेन टार्न सकेमा झण्झटबाट बच्न सकिनेछ। बोलीमा कठोरता आउनाले सामाजिक छवि बिग्रन सक्छ, त्यसैले व्यवहारमा सौम्यता आवश्यक छ। धार्मिक वा आध्यात्मिक मार्गमा लागे केही राहत मिल्न सक्छ। आत्मनियन्त्रण र विवेक प्रयोग गर्दा स्थिति सुधार हुनेछ। मन शान्त राखेर अघि बढ्नु नै हितकर हुनेछ।
सिंह (मा, मि, मु, मे, मो, टा, टि, टु, टे):
सप्ताहको आरम्भमा पहिले रोकिएका काम पुनः सुरु हुनेछन्। कार्यक्षेत्रमा देखिएका बाधाहरू हट्दै जानेछन् र नयाँ योजनाहरू सफल हुनेछन्। अघिल्लो सफलताले आत्मविश्वास बढाउनेछ र भविष्यको ठोस जग बसाउने मौका मिल्नेछ। विद्यार्थीहरूका लागि पनि सफलता पाउने अनुकूल समय हुनेछ। प्रेम सम्बन्धमा सकारात्मक मोड आउनेछ र यात्रा सम्भावना प्रबल छ। प्रेमी-प्रेमिकाबीचको सम्बन्धमा प्रगाढता बढ्नेछ। सानातिना प्रयासले ठूलो सफलता दिलाउन सक्छ। आफूलाई सशक्त बनाउने अवसर छ, त्यसैले हरेक दिनलाई सदुपयोग गर्नु उपयुक्त हुनेछ।
कन्या (टो, प, पि, पु, ष, ण, ठ, पे, पो):
कन्या राशि भएकाहरूका लागि यो साता विशेष रूपले शुभ रहनेछ। सबै काममा परिवार र साथीहरूको पूर्ण साथ पाइनेछ। बुद्धिको सदुपयोगले राम्रो धन आर्जन हुनेछ भने सामाजिक प्रतिष्ठा पनि बढ्नेछ। प्रेम र मित्रताको सम्बन्ध मजबुत हुनेछ, जसले मनमा खुसी ल्याउनेछ। सरकारी वा सामाजिक क्षेत्रमा सम्मानित हुने सम्भावना छ। यात्राले नयाँ अनुभव दिनेछ भने व्यवसाय पनि फस्टाउनेछ। आत्मविश्वास भरिएको यस साता तपाईंलाई नेतृत्वदायी अवसरहरू प्राप्त हुनेछन्। नयाँ योजना प्रारम्भ गर्न उचित समय हो।
तुला (र, रि, रु, रे, रो, ता, ति, तु, ते):
यो साता भाग्य बलियो देखिन्छ। महत्वपूर्ण कार्यहरू सफलता पूर्वक सम्पन्न हुनेछन् र भविष्यलाई प्रभावित पार्ने योजना सुरु गर्न सकिनेछ। नयाँ साझेदारी र पारिवारिक सहयोगले काममा गति दिनेछ। प्रतिस्पर्धात्मक वातावरण भए तापनि आम्दानीमा कमी नआउने संकेत छ। प्रेम सम्बन्धमा नयापन आउनेछ भने यात्राको सम्भावना प्रबल छ। धार्मिक यात्राको सम्भावनाले मनमा शान्ति ल्याउनेछ। सामाजिक छवि मजबुत बन्नेछ र सहयोगी मनोवृत्तिका मानिसहरूसँग सम्बन्ध बलियो हुनेछ। समय अनुकूल रहेकोले हर कदम सोचविचार गरेर चाल्नु हितकर हुनेछ।
वृश्चिक (तो, ना, नि, नु, ने, नो, या, यि, यु):
वृश्चिक राशि हुनेहरूका लागि यो साता अत्यन्तै फलदायी देखिन्छ। व्यापारमा अनुकूलता बढ्नेछ र नयाँ लगानीको अवसर प्राप्त हुनेछ। पारिवारिक सहयोगले आम्दानीमा वृद्धी हुनेछ। मान-सम्मान प्राप्त हुने सम्भावना प्रबल छ, विशेषगरी सप्ताहको मध्यतिर। मनोरञ्जनात्मक खर्च भए तापनि त्यसले चिन्ता दिन्ने छैन। कृषि र पशुपालन सम्बन्धी कार्यबाट लाभ हुने संकेत छन्। आमाको आशीर्वादले हरेक कार्यमा सफलता मिल्नेछ। सामाजिक क्षेत्रमा आफ्नो उपस्थिति बलियो हुनेछ। नयाँ सम्पर्कहरूले भविष्यमा सहयोगी भूमिका खेल्नेछन्।
धनु (ये, यो, भ, भि, भु, ध, फा, ढ, भे):
धनु राशि हुनेहरूका लागि यो साता चुनौतीपूर्ण रहनेछ। कार्यमा असफलता र नकारात्मक परिस्थितिले मनमा निराशा ल्याउनेछ। आफन्त वा नजिकका व्यक्तिहरूबाट धोका पाउने सम्भावना छ। साझेदारीका काम असफल हुने देखिन्छन्, जसले सम्बन्धमा खटपट निम्त्याउन सक्छ। राजनैतिक वा कानुनी झमेलामा नपर्नु नै बुद्धिमानी हुनेछ। दुर्घटना वा चोटपटकको सम्भावना रहेकाले सजग रहनु आवश्यक छ। मानसिक तनावले कार्यक्षमता घटाउन सक्छ। आत्म-निरीक्षण गर्दै निर्णय लिनुपर्छ। धैर्य र संयम नै तपाईको सबैभन्दा बलियो हातियार बन्न सक्छ।
मकर (भो, ज, जि, खि, खु, खे, खो, गा, गि):
सप्ताहको प्रारम्भ सामान्य समस्यासहित सुरु भए तापनि समग्रमा मकर राशि हुनेहरूका लागि समय अनुकूल देखिन्छ। बुद्धिको प्रयोगले आर्थिक उन्नति हुनेछ। नयाँ योजना र काम सुरु गर्ने अवसर मिल्नेछ, जुन दीर्घकालीन फाइदाका लागि लाभदायक हुनेछ। अरूले असफल भएका कार्यमा सफलता पाउने सम्भावना प्रबल छ। कलाकार तथा खेलाडीहरूका लागि पनि समय अनुकूल देखिन्छ। नयाँ स्रोतहरूबाट आम्दानी बढ्नेछ र प्रतिष्ठा समेत बढ्नेछ। प्रतिस्पर्धीहरू सहजै परास्त हुनेछन्। आत्मबल बढ्नेछ र सामाजिक वृत्तमा प्रभावशाली छवि निर्माण हुनेछ।
कुम्भ (गु, गे, गो, सा, सि, सु, से, सो, द):
सप्ताहको शुरुवातमा पारिवारिक विवादले मनमा अशान्ति ल्याउनेछ। निर्णय गर्दा घरभित्र छलफल नगर्दा समस्या थपिन सक्छ। कार्यक्षेत्रमा पनि विवाद निम्तिन सक्नेछ, त्यसैले बोलीमा नियन्त्रण आवश्यक छ। आर्थिक पक्ष बलियो रहनेछ र नसोचेको स्थानबाट लाभ प्राप्त हुनेछ। घरजग्गा सम्बन्धी कारोबारबाट राम्रो फाइदा हुने संकेत छ। प्रेम सम्बन्धमा मधुरता आउनेछ भने जीवनमा नयाँ मित्रताको सुरुवात हुन सक्नेछ। चुनौतीबीच पनि अवसरहरू फस्टाउनेछन्। संयमता अपनाउँदै अघि बढे राम्रो उपलब्धि सम्भव छ।
मीन (दि, दु, थ, झ, ञ, दे, दो, च, चि):
यो साता हतार र लापरवाहीले समस्या निम्त्याउने देखिन्छ। बनिसकेको काम बिग्रन सक्नेछ, जसले मानसिक तनाव दिनेछ। प्रेम सम्बन्धमा दरार आउन सक्छ र आफन्तबाट टाढिनुपर्ने परिस्थिति आउन सक्छ। स-साना कार्यमा पनि कठिन संघर्ष गर्नु पर्नेछ। स्वास्थ्यमा समस्या देखिएर खर्च बढ्न सक्छ। यात्राको अवसर भए तापनि त्यसबाट खास लाभ नहुने सम्भावना छ। आफ्ना नजिकका व्यक्तिबाट धोका पाउँदा मन दुख्नेछ। आत्मचिन्तन र ध्यानमार्गले राहत मिल्न सक्छ। परिस्थिति अनुसार व्यवहार परिवर्तन गर्नु नै उत्तम हुनेछ।
