काठमाडौं : नेपाल क्रिकेट संघ (क्यान)ले सञ्चालन गरेको ‘दि कोर क्याम्प’को दोस्रो चरणका लागि २५ सदस्यीय टोलीको घोषणा गरेको छ।
पहिलो चरणमा निरन्तर सहभागी हुँदै आएका कुशल मल्ल यसपटक अन्तिम टोलीमा समावेश हुन भने असफल भए, त्यस्तै देव खनाल पनि द्वितीय चरणसम्म पुग्न सकेनन्।
नयाँ टोलीको कप्तानी रोहित पौडेलले गर्नेछन्। कोर क्याम्प अन्तर्गत चार टोली—निलो, हरियो, रातो र पहेँलो—बनाएर मुलपानीको माथिल्लो तथा तल्लो मैदानमा प्रतिस्पर्धा सम्पन्न गरिएको थियो।
प्रधानमन्त्री कप क्रिकेट प्रतियोगिता मार्फत क्यानले सुरुमा ५२ खेलाडीलाई छनोट गर्यो र त्यसपछि कोर क्याम्पका लागि अष्ट्रेलियन प्रशिक्षक स्टुअर्ट लको आगमनपछि यो दोस्रो चरण आयोजित गरिएको हो।
यसैबीच, नेपाल क्रिकेट संघले मे महिनामा हुने बेलायत भ्रमणका लागि राष्ट्रिय टोलीको खेल तालिका पनि सार्वजनिक गरेको छ। आइसिसी क्रिकेट वर्ल्ड कप लिग–२ अन्तर्गत स्कटल्याण्डसंगको सिरिज अघि नेपालले बेलायतमा पाँच अभ्यास म्याच खेल्ने योजना बनाएको जनाएको छ।
दोस्रो चरणमा छनोट भएका २५ खेलाडी
रोहित पौडेल (कप्तान), आशिफ शेख, कुशल भुर्तेल, अनिल साह, भिम सार्की, दिपेन्द्रसिंह ऐरी, गुलशन झा, अर्जुन साउद, बसीर अहमद, दिलीप नाथ, आरिफ शेख, युवराज खत्री, किरण ठगुन्ना, सन्दीप लामिछाने, ललित राजवंशी, शहाब आलम, सोमपाल कामी, करण केसी, नन्दन यादव, प्रतीस जीसी, रिजान ढकाल, आकास चन्द, रुपेश सिंह, लोकेश बम र शुभ कंसकार ।
