काठमाडौं : बन्दीपुर केबलकार एण्ड टुरिजम लिमिटेडले आज भदौ ११ गते बुधबारदेखि सर्वसाधारणका लागि प्रारम्भिक सार्वजनिक निष्कासन (IPO) खुला गरेको छ।
यसअघि कम्पनीले आयोजना प्रभावित क्षेत्रका स्थानीयवासी र वैदेशिक रोजगारीमा रहेका नेपालीका लागि छुट्याइएको सेयर निष्कासन गरी बाँडफाँड गरिसकेको थियो।
धितोपत्र बोर्डबाट कुल ५८ करोड ६० लाख रुपैयाँ बराबरको ५८ लाख ६० हजार कित्ता सेयर निष्कासन गर्ने अनुमति पाएको कम्पनीले पहिलो चरणमा ५ लाख ६६ हजार कित्ता स्थानीयका लागि, ५ लाख २९ हजार ४०० कित्ता वैदेशिक रोजगारीमा रहेका नेपालीका लागि, १ लाख ५८ हजार ८२० कित्ता आफ्ना कर्मचारीका लागि र २ लाख ६४ हजार ७०० कित्ता सामूहिक लगानी कोषका लागि छुट्याएर वितरण गरिसकेको छ।
अब भने दोस्रो चरणमा कम्पनीले सर्वसाधारण लगानीकर्ताका लागि प्रतिकित्ता १०० रुपैयाँ अंकित मूल्यमा ४३ लाख ४१ हजार ८० कित्ता सेयर निष्कासन गरेको हो।
यसमा लगानीकर्ताले न्यूनतम १० कित्ता र अधिकतम २० हजार कित्तासम्म आवेदन दिन सक्ने व्यवस्था गरिएको छ। आवेदन अवधि भदौ १५ गतेसम्म तोकिएको भए पनि आवश्यकता अनुसार भदौ २५ गतेसम्म खुला रहनेछ।
यस आईपीओ निष्कासनका लागि कम्पनीले केयर रेटिङ नेपालबाट ‘केयरएनपी डबल बी इस्यूअर’ रेटिङ प्राप्त गरेको छ, जसले कम्पनीको दायित्व पूरा गर्ने क्षमतामा औसत स्तरको जोखिम रहेको जनाउँछ।
