दक्षिण अफ्रिकाका पूर्व क्रिकेटर निक पोथास नेपाली पुरुष राष्ट्रिय क्रिकेट टोलीका कन्सल्ट्यान्ट प्रशिक्षक नियुक्त भएका छन्।
नेपाल क्रिकेट संघ (क्यान) ले आगामी स्कटल्याण्ड भ्रमणका लागि पोथासलाई कन्सल्ट्यान्ट प्रशिक्षकको रूपमा नियुक्त गरेको हो।
पोथासले सन् २००० मा दक्षिण अफ्रिकाको राष्ट्रिय टोलीबाट तीन एकदिवसीय अन्तर्राष्ट्रिय (ODI) खेल खेलेका थिए।
खेल जीवनपछि उनले श्रीलंका (२०१७–२०१८) र वेस्ट इन्डिज (२०१८–२०१९) का अन्तरिम मुख्य प्रशिक्षकको रूपमा काम गरेका छन्।
साथै, उनले श्रीलंका र वेस्ट इन्डिज टोलीहरूमा सहायक तथा फिल्डिङ प्रशिक्षकको भूमिका पनि निर्वाह गरेका छन्।
हालैसम्म, पोथास बंगलादेश क्रिकेट टोलीका सहायक मुख्य प्रशिक्षक थिए, तर पारिवारिक कारण देखाउँदै उनले सन् २०२५ को सुरुमा उक्त पदबाट राजीनामा दिएका थिए ।
नेपालको राष्ट्रिय टोली हाल विश्वकप लिग २ अन्तर्गतको चौथो चरणका खेलहरू खेल्न स्कटल्याण्डमा छ। यस भ्रमणमा नेपालले घरेलु टोली स्कटल्याण्ड र नेदरल्याण्ड्ससँग प्रतिस्पर्धा गर्नेछ ।
पोथासको अनुभवले नेपाली टोलीलाई आगामी खेलहरूमा थप मजबुत बनाउन मद्दत पुर्याउने अपेक्षा गरिएको छ।
