काठमाडौँ : भारतीय अभिनेत्री तथा नृत्याङ्गना नोरा फतेही नेपाल आउदैछिन् । सामाजिक संस्था ‘ह्युुमन रेस्पेक्ट नेपाल’ को सहयोगार्थ आयोजना हुने च्यारिटी कार्यक्रमका लागि अभिनेत्री फतेही नेपाल आउन लागेको आयोजक वल्डवाइड फिल्मस् नेटवर्क प्रालिले काठमाडौँमा पत्रकार सम्मेलन गरी जानकारी दिएको छ ।
संस्थाका अध्यक्ष देव मगरका अनुसार शिक्षाबाट वञ्चित बालबालिकाको क्षेत्रमा काम गर्दैआएको सामाजिक संस्था ‘ह्युुमन रेस्पेक्ट नेपाल’ को सहयोगार्थ च्यारिटी कार्यक्रमका लागि अभिनेत्री फतेही नेपाल आउन लागेकी हुन् । उनले भने, “मनोरञ्जनमार्फत सामाजिक कार्यलाई सहयोग गर्ने उद्देश्यले हामीले यो कार्यक्रम गर्न लागेका हौँ ।”
आगामी जेठ ३ गते ‘नोरा फतेही लाइभ इन नेपाल’ कार्यक्रम आयोजना हुने भएको हो । नेपाल आउन र नेपालीलाई भेट्न आफू उत्साहित रहेको अभिनेत्री फतेहीले बताएकी छिन् । उनले एक श्रव्यदृश्य सन्देशमार्फत आफू पहिलो पटक नेपाल आउने र यहाँबाट अहिलेसम्म प्राप्त गरिरहेको मायाका लागि धन्यवाद व्यक्त गर्दै आफ्नो प्रस्तुति दिने बताएकी छिन्।
“म काठमाडौँ आउन उत्साहित छु, यो मेरो पहिलो भ्रमण हुनेछ, सामाजिक कार्यका यो कार्यक्रमलाई सफल बनाउन सबैलाई आग्रह गर्दछु” उनले भनिन्। इभेन्टको व्यवस्थापन मनु मिडिया प्रालिले गर्नेछ । अभिनेत्री फतेहीको ‘दिलबर दिलबर’, ‘कुसु कुसु’, ‘ओ साकी साकी’, ‘नाच मेरी रानी’, ‘स्नेक डान्स’लगायत गीत लोकप्रिय छन् ।
उक्त कार्यक्रममा नेपाली कलाकारहरु दुर्गेश थापा, नृत्याङ्गना तेरिया फौजा मगर, नृत्यकार समर्पण लामालगायतले प्रस्तुती दिनुहुने आयोजित पत्रकार सम्मेलनमा जानकारी गराइयो । उक्त कार्यक्रमको टिकट ‘खल्ती’ एपमा उपलब्ध रहेको आयोजक तथा कार्यक्रम संयोजक मनिष कार्कीले जानकारी दिए।
टिकट जनरलको लागि २ हजार , फ्यानपिटको ४०००, भिआईपीको ७००० र भिभिआईपीको टिकट १६००० रहेको छ। यससँगै ग्रुप टिकट ५००० देखि सुरु भई ६८००० सम्मका छन्। जनरलमा ग्रुप टिकट ५००० हजारमा काट्न सक्नुहुन्छ, जुन टिकटले ३ जनाले प्रवेश पाउनेछन्। जनरलमै ८००० मा ग्रुप टिकट काट्न सक्नुहुन्छ, जुन टिकटले ५ जनाले प्रवेश पाउनेछन्। फ्यानपिटमा ग्रुप टिकट १०००० मा काट्न सक्नुहुन्छ, जसबाट ३ जनाले प्रवेश पाउनेछन्। यसका साथै फ्यानपिटमा १५००० को ग्रुप टिकट काट्नुभयो भने ५ जनाले प्रवेश पाउनेछन्। भिआईपीको ग्रुप टिकेट १७०००, २८००० को जसमा क्रमश: ३ जना र ५ जनाले प्रवेश पाउनेछन्। अन्तत : भिभीआईपीमा ४० हजार र ६८००० हजारका ग्रुप टिकट छन्, जसमा क्रमश : ३ र ५ जनाले प्रवेश अनुमति पाउँछन्।
